कोभिड र आर्थिक मन्दीले पिल्सिएका व्यवसायीको कथा 'के घर के डेरा : घर नं २'

काठमाडौँ — नाकाबन्दीका कारण फलफूल र तरकारी कन्टेनरमै कुहिएर ठूलो आर्थिक क्षति बेहोरेका व्यवसायी आफ्नो महलबाट भाडाको कोठामा संघर्ष गर्छन् । ऋण तिर्न घर बेचेर कोठामा बसेका उनी आफूलाई अरूले दिनुपर्ने उधारो रकम नदिँदा भने पटक-पटक पीडाले छटपटाउँछन् । कतिसम्म भने उनी आत्मदाहको प्रयाससम्म गर्छन् । यो फिल्म ‘के घर के डेरा : घर नं २’ को कथा हो ।

कथा यति मात्रै छैन, पछिल्लो समय नेपालले भोगेको आर्थिक मन्दी र त्यसले व्यवसायमा पारेको प्रभावलाई फिल्मको कथाले बोकेको छ । नाकाबन्दी, कोभिड-१९ र त्यसपछि उत्पन्न आर्थिक मन्दी, बस दुर्घटना, एक व्यवसायीले बानेश्वरमा गरेको अत्मदाह, मिटरब्याज, अश्लील सामग्री पठाएर गरिने साइबर क्राइमजस्ता देशका पछिल्ला प्रतिनिधि आर्थिक र सामाजिक घटना वरिपरि फिल्मको कथा बगिरहन्छ ।

घरबेटीको भूमिकामा छन् आ र्यन सिग्देल । कोभिड र आर्थिक मन्दीअघिसम्म राम्रोसँग चलेको ट्राभल व्यवसाय डुबेर घर नै लिलाम हुने स्थिति कसरी सिर्जना हुन्छ र त्यसले घर परिवारमा कस्तो किसिमको असर पुगेको छ भन्ने दृश्य फिल्ममा देखाइएको छ ।